ننشر لكم الشهادة الرابعة ضد السينمائي إ.ع. نشكر صاحبة الشهادة على وضع ثقتها فينا وعلى مشاركة شهادتها معنا، ونتعهد لها أننا سنبذل كل ما في استطاعتنا من أجل الحفاظ على خصوصيتها
إليكم نص الشهادة كما وردت إلينا من صاحبتها
من ٤ سنين كنت بدخل مجال السينما و بحاول اشق طريقي فيه و أعمل فيلم وثائقي فكرته ابتدت معايا من السنة إللي قبلها بفيلم قصير. بس بما إني مدرستش سينما و لا دخلت أي ورش لتعليم السينما أخدت موضوع التعلم بالتجربة و باني أقابل ناس و احكيلهم علي الفيلم و أخد رأيهم و أشوف هاطوره إزاي
واحد من أهم الناس إللي الناس اقترحتوا عليا و من كذا حد أقابله هو إ.ع. و بتأكيد من ناس كتير إنه هيبقي مفيد لشغلي و هيقدر يساعدني أقدم علي منح إنتاجية للفيلم لإنه إشتغل كتير كجزء من لجان التحكيم و عنده خبرة كبيرة بالنوع دة من الشغل و إنه من رواد السينما المستقلة في مصر. أتواصلت معاه فعلا بعد ما صديقة مشتركة بلغته و اتفقنا نتقابل و قاللي إنه اجيله البيت عشان مكتبه فيه. في الوقت دة أنا كنت متجوزة،و سألت صاحبتي و كذا حد و اتقالي إنه أمان و إنه متجوز و متقلقيش من حاجة و لقيت علي فيس بوك إنه بيني و بينه أصدقاء مشتركين كتير
و روحت فعلا و قابلت مراته و عيلته و اكتشفت لما قابلته إنه يعرف أهل جوزي فاطمنت اكتر و اكتر. و حصل و روحت مرتين و قعدت أطور الفكرة و ابعت اسأله ف حاجات و مكنش في أي حاجة مريبة علي الاقل زي ما أنا حسيت ساعتها من ناحيتي. و قدمت ملف الفيلم للجهة المانحة و حطيت إسمه كحد مرجع و كنت متحمسة جدا و بعتله إني بعت الفيلم و قاللي ساعتها خلينا نتقابل من غير شغل و لا ضغط
ساعتها قلت لحد من أصحابي و قالي خدي بالك منه معروف إنه “وغد” و أنا كان ردي ساعتها إنه لا يمكن حاجة تحصل و هو عارف إني متجوزة و يعرف أهل جوزي و أنا عارفة إنه متجوز و الكلام كان دايما علي الفيلم و مفيش أي كلام عن حاجة شخصية ما بينا
روحت و معايا هدية لبنته كشكر للمجهود إللي حصل معايا في كتابة المقترح. و حتي جبت فاكهة للبيت و كأني بزور حد من أصحابي عادي. و روحت و ابتديت أقطع الفاكهة في المطبخ ، و في ثواني و أنا ماسكة السكينة ، نط علي ضهري من ورا و حاول يبوسني بالعافية و مسكني من صدري جامد. أنا زقيته في ساعتها و ف أيدي السكينة و صرخت اية إللي بتعمله دة. و رد ببرود شديد انا فهمت غلط
قعدت بعديها و أنا جسمي منتفض و قاللي معلش تاني أنا فهمت العلامات غلط، و قررت أقعد و أكمل كلام عشان الموضوع ميبقاش غريب و ما امشيش في ساعتها. من الصدمة طبعا قعدت و اتكلمت و احكي كلام مش متزن و هرتلة و هو قعد يشجعني إني اتطلق و إني امشي ف الدنيا بحرية و نزلت و قلتله أنا نازلة اتطلق يلا باي بقي و كاني بأجري و بأسمع كلامه فعلا و مع ذلك و أنا ماشية حاول يبوسني بالعافية و أنا جريت
بعديها بطلت كل حاجة ليها علاقة ب الفيلم و رميت الماتريال كله و شلته و سبت البلد كلها و مشيت و قعدت ألوم نفسي كتير اوي إني “فهمت العلامات غلط” و إني ساذجة و حطيت نفسي في الموقف دة و إني عملت في نفسي كدة. لغاية من سنة و نص بس لما فهمت و إستوعبت إن إللي حصلي دة إسمه اعتداء و إن مفيش حاجة إسمها علامات تتفهم غلط و إن إللي اتعرضت له دة تروما و إن دة السبب إني بطلت كل حاجة ليها علاقة ب الفيلم، إللي لغاية دلوقتي مش عارفة ارجع ليه و لا أطلعه من ملفاتي و اشوفه. لأن أنا ارتبط عندي إنه ساعدني بس عشان الغرض دة و مكنش عايز حاجة تانية و إني مش كويسة و لا كان عندي فكرة و لا نيلة
و من سذاجتي لما توصلت للاكتشاف دة، بعتله رسالة من سنة بنبرة اعتذارية جدا إني مش ناسية إللي إنت عملته و قلتله اثر عليا ازاي و طلبت منه انه يا ريت متعملش دة تاني مع أي حد لأني كنت فاكرة اني حالة فريدة و حصل معايا أنا بس. و شاف الرسالة و مردش عليها
أنا باكتب شهادتي عشان الشهادات إللي انتشرت عنه مش الأولي و لا هيا حالة فريدة و أكيد مش الأخيرة و متأكدة إنه فيه ناس تانية كتير و إن إللي اتنشر و بيتنشر نقطة في بحر. و باكتبها عشان الناس تتحذر منه و تبطل تديله أي مساحة إنه يأثر و إنه يقابل بنات عايزة تمثل أو تخرج أو تكتب تحت دعوي إنه يساعدهم أو أي حاجة من دي لإنه ممكن جدا حياة البنت دي تتدمر من تحت رأس معرفته و هما مش عارفين و يتسبب إن البنات دول يبطلوا حاجات هما عايزين يعملوها و بيحبوها و ممكن دة يكون حصل لناس كتير اصلا. و باكتب لأني مستفزة جدا جدا من حالة الاحتفاء بي إللي حاصلت و إللي كانت سبب رئيسي ورا إني عرفته و اتعرضت لمحاولة للاعتداء دي إللي غيرت حياتي تماما
