تواصلت معنا صاحبة الشهادة رقم 23 على المدونة، والتي نُشرت منذ ثلاث أيام ضد الناشط الحقوقي و.ع. وطلبت منا نشر ملحق بشهادتها تضيف فيه على ما ورد في متن الشهادة المنشورة. والتزامًا منا بالمبادئ التي أعلنا عنها منذ بداية عملنا والتي تتضمن أن “لصاحبات الشهادات الحق في تعديل أو حذف أو الإضافة على شهاداتهن، في أي وقت وبدون إبداء أسباب”، قررنا نشر إضافات صاحبة الشهادة في هذا الملحق
إليكم النص المُضاف كما ورد إلينا من صاحبة الشهادة
تابعت ردود الأفعال بعد شهادتي ضد الناشط اللي نشرتها على المدونة باسم الشهادة رقم ٢٣ واللي الشخص الي بتهمه عمله من تكذيب ونشر سكرينات مقتطعة من سياقها لحوارات بيننا عشان يثبت براءته، واتهمني هو واللي بيدافعوا عنه اني مضطربة نفسياً وبأختلق أحداث أو إني بأحبه وبأنتقم منه عشان مرضاش يعمل معايا علاقة مستمرة. وعشان كدة أنا بأكتب التعقيب ده عشان أوضح كذا نقطة.
هو باني دفاعه على أساس إننا فضلنا على اتصال بعد اللي حصل وفضلنا أصحاب، والحقيقة هو ما قالش أي حاجة جديدة لأني أنا نفسي في الشهادة قايلة إني أنا اتلخبطت وغلطت نفسي وأقنعت نفسي إني أنا عملت ده بمزاجي وإن سبب إني مكنتش عايزة هو إني مش فاهمة الدنيا وإني مقفلة وعندي عقد ومش تقدمية كفاية. وحملت نفسي مسؤولية اللي حصل وفضلت أتعامل معاه كصديق وكمثل أعلى بيعرفني العالم.
هو بيقول أن كل حاجة حصلت بالتراضي ، وإنه ما بيغصبش حد على حاجة، وده وارد لو مفهومه عن الغصب هو إنه يضربني أو يربطني أو يزقني في الحيطة، لكن في حاجة اسمها استغلال جنسي واستغلال ظروفي ووضعي وأنا وقتها كنت خارجة من تجربة عنيفة جداً هو أكتر واحد عارفها وكمان بشوفه كمصدر أمان ومثل أعلى وبعد إلحاح وتلاعب بالكلام وأنا في حالة صدمة من إنه بيفرجني الحاجات دي. ورغم كدة أنا اقنعت نفسي بكلامه وفضلت أغلط نفسي بل فضلت بعدها حاسة بتأنيب ضمير إني مش عايزة أعمل ده وإني مش بعرف أعمل ده من غير حب ومش عايزة أطلع أنا الي معقدة ومش فاهمة نفسي وفضلت أبرر وأكرر إني مكنتش مستريحة وكأني بأعتذر وهو يقنعني إني لازم أتحرر وإن اللي حصل بنا ده إنجاز عشان “عملناها” بعد ما كنت بقاوم ومترددة. وتقدروا تشوفوا ده في السكرين شوتات التالية ـ
في نفس البوست بيدعي إنه مستغرب ومصدوم ومندهش إني بأدعي الإدعاءات دي والحقيقة هي إنه مش مندهش ولا مصدوم ولا حاجة لأني بالفعل عملت معاه مواجهة في شهر يوليو اللي فات بعد ظهور الموجة الأولانية من الشهادات واللي خلتني أعيد تفكير وفهم إللي حصل معايا وساعتها كنت لسة عندي عشم فيه وكنت بأواجه وبأعاتبه وأنا لسة بأكنله احترام ومودة وبأعتبره مثل أعلى برضو! وهو استخف بكلامي وقلبه تهريج وتوه الموضوع. المواجهة دي قمت بيها بناء على نصيحة صديقة مشتركة هي اللي شجعتني أواجهه لما حكيت لها اللي هو عمله وكانت داعمة جداً وقتها. الصديقة دي نشرت فيديو شهدت فيه إن اللي هو عمله معايا إنه فرجني فيديوهات ستات معاه ده فعل تحرش وانحطاط وكمان واجهته من كام يوم، وللأسف اضطرت تمسح الفيديو بعد ما المدافعين عنه دخلوا هاجموها وطالبوها تكشف هويتي. وأنا ممتنة ليها ولموقفها معايا بالرغم من إن هي مغالطاني في الجزء التاني من القصة . والسكرين شوت اللي جاية فيها مواجهتي له في شهر ٧ اللي فات
السكرين شوتات دي بتثبت كمان إني ما كدبتش لما كتبت إني كنت بأسأله على حاجات ليها علاقة بالسياسة والحقوق وبتثبت تاني إني مكنتش عاملة حسابي إني أروحله البيت وإنه فاجئني بعد ما كنت خلاص تقريبا وصلت. ولزيادة تأكيد، السكرين شوت التالي كان لكلامنا قبل ما أروحله بيوم وإحنا بنتفق على المعاد
وافتكر دي تاني زيارة ليا لما طلب يشوفني دا كان ردي
منكرش ان خلال السنتين دول كنت في قمة التشتت ما بين ان انا صح ولا كلامه صح وكتير قولتله لما انزل هشوفك لكن ولا مره عملت دا واعتقد على حد وصفه (نلحق نتكلم) يعني سبب الزيارة زي ما ذكرت سابقا أني كنت متشوقة أستمد منه معلومات ويشرح لي حاجات ويرد على اسئلتي بخصوص حاجات يمكن خانني اللفظ لما قلت عليها (حقوقية) وأنا كنت أقصد سياسية و دينية و ووجودية وشخصية ،، ولكن الأكيد أني عمري ما استشرته أو قلتله إني عندي كبت الجنسي وعايزة أحرره معاه
هو بيقول إن كل اللي حصل بيننا ده حصل بالتراضي وبمزاجي بس في نقطة مهمة هو ما جابش سيريتها رغم إنها تقريباً أخطر نقطة وهي موضوع الفيديوهات. في البوست بتاعه ولا نفى إنه مسجل فيديوهات ولا أكد إنه سجلها برضا الستات اللي مصورهم، ولا نفى إنه فرجني حاجة. طب هل ده نعتبره اعتراف إنك فرجتني؟ ولو فرضنا إن الستات دي موافقين يتصوروا فعلاً، هل موافقين إنك تفرج فيديوهاتهم لناس تانية بدون إذن؟
نقطة كمان وهي إني مش مسؤولة إنه عنده خصومات مع طوب الأرض، ومش مسؤولة لو خصومه قرروا يستخدموا شهادتي تصفية حسابات بينهم وده ما يغيرش حاجة في اللي هو عمله ولا يفقد شهادتي مصداقياتها.
وبما ان دا أخر رد ليا لأن فعلا إنت واللي بيدافعوا عنك استهلكتم كل طاقتي وطاقة اي واحدة تفكر تتكلم عن تجربة بشعة مرت بيها ، أحب أقول ان الفرق بيني وبينك ان انا قررت ادين نفسي قبل ما ادينك واعترف بذنبي وأكفر عنه بأني اعرض تجربتي على غيري عشان محدش يغلط نفس الغلطة ،، مطلعتش قولت شربني حاجة صفرة وخدرني انا حكيت الحصل بالظبط وادانت فيه نفسي اولا و قلت اني استمريت على تواصل معاك ومش بس كدا انا كنت بدعم مواقفك لكن شعوري وانا بعمل دا انا بس الأحكم عليه محدش عاشوا مكاني وانا لا ادعي ان امتلك تفسير واضح غير اني كنت عارفة كويس اوي اي محاولة مني لأني اظهر امتعاضي او اني اعمل بلوك فانت هتطلعني (عالمسرح) زي اي حد غيري بيختلف معاك في الرأي ،، احنا مش عايشين في المدينة الفاضلة كلنا بنغلط وكلنا بشر بس الفرق ان انا كنت طول الوقت شايفة نفسي غلطانة لوحدي ازاي انا مهلهلة وتافهة اني اروح معاك من البداية ،، بس اقولك ليه لأن المعنفات في حياتهم او زي ما بتحاولم تشككوا في مصداقية روايتي بأني أعاني من معاناة نفسية بيكونوا طول الوقت مشتتين وفي محاولة لتغيير واقعهم عن طريق اي حد يحسسهم انه بينتصر لقضيتهم ،، شخص طول الوقت بيعلمنا ان التحرش جريمة وإن مجرد ما شخص يبعت لواحدة انبوكس صورة اباحية او كلام اباحي فدا متحرش وسافل فكان عندي ثقة ويقين ان انت آخر شخص ممكن يعمل دا ،، وبكرر دا مش مبرر لان اتعلمت من التجربة دي ان المبادئ سهلة كشعارات نستقطب بيها أكبر عدد من الفولورز والمتابعين مع الإختبارات الحقيقية لمبادئنا دي بتطلع معادنا ،، وبمناسبة ترويجكم في اي رد على كلامي بالاشارة لحالتي النفسية ووضعي النفسي فأعتقد دا مش وصم لأن محدش فينا مسؤول عن ظروف نشأته او الانسكيورتيز اللي عنده واعتقد دا سبب أدعى انك كنت تراعي دا وقت الواقعة مش انك تتهمني بالقسوة على نفسي وان دا حقي وحريتي لمجرد اني شايفة اني مش عايزة علاقة جنسية وقتها ،، تشهيرك بيا والتهديد طول الوقت بأبني أو بأهلي فصدقني أنا لما اتكلمت قررت اتحمل العواقب عشان يمكن اساعد اني غيري ميكونش في موقفي وان يتم الضغط عليه بالشكل البشع دا الأبناء عمرهم ما كانوا سلاح نتحارب بيه واعتقد الأهل والأبناء لما يعرفوا ان أنا قررت أحمي غيري هيكون أفضل من اني سكتت باقي حياتي ،، مش عيب نغلط لكن عيب نستمر في الغلط ،، أرجوكم متروحوش لحد بيته ايا كان السبب ،، متركبوش مع حد عربيته ،، مهما كان العنف الأسري او المشاكل في حياتكم صدقوني هي أفضل بكتير من قسوة الأنا فيه ،، شكرا ودا أخر رد مني على اي حاجة مهما كانت
نقطة أخيرة ، الحقوقي ان أخطأ فدا لا يوصم الحقوقيين بأي شكل من قريب او من بعيد لان كل شخص فينا بالغ وراشد بما فيه الكفاية ومسؤول عن تصرفاته ،، واي خطأ او فعل مشين من شخص متبني أي أيدلوجية أيا كانت فدا لا يوصم كافة متبعيها أو متبنيها .. كل شخص مسؤول عن أفعاله فقط
