أحيانا ما نحتاج وقت، حتي نستطيع تمسية ما مررنا به من خبرات اعتداء ونفهم حقيقة مشاعرنا تجاهه، وتجاه الشخص المعتدي. تحكى لنا صاحبة الشهادة كيف مرت بمشاعر إنكار ولوم ذات وتشكيك في نفسها حتي استطاعت أخيرا بمساعدة من حولها أن تفهم تجربتها ومشاعرها، وتقرر إن تتعامل مع تبعتها. نشكر صاحبة الشهادة على مشاركة قصتها معنا، ونشاركها معكم كما وردت إلينا
“من فترة كنت خارجة من علاقة بشكل صعب، وزائد ده خسرت شغل واصحاب وعلاقتي بأهلي اتدمرت .. فضلت فترة في البيت مابتعاملش مع حد ومش عارفة قابل بشر اعرفهم لان ده تقيل عليا
لحد ما في يوم ظهر “ح.ح” وهو شخص له أعمال فنية متنوعة ما بين الشعر والكتابة
الشخص ده يبقى صديق للاكس بتاعي، ويبقى عندي ع الفيسبوك، من قبلها بفترة اتكلمنا مرتين كان بيطلب فيهم اننا نتقابل، وأنا بطنش عادي وماكنش في اي شئ مريب. المهم الشخص ده دخل كلمني وقالي اخدت بالي من بوستاتك انك مش بخير وما إلي ذلك. وعرض عليا اننا نتقابل ونتكلم أكتر وأنه مهتم يسمع مني
وحصل بالفعل اتفقنا، واتقابلنا في مكان .. ماكنش في اي شئ مريب وكان في البداية چان جدًا وذوق ومحترم.. اتكلمنا وحكيتله أشياء كتير حصلت، وحكيتله اني اتعرضت لتحرش من صاحب الشغل، وعن الأحداث وعن قد ايه أنا في حتة صعبة في حياتي ،ومش عارفة اعمل شئ.. وهو ابتدي يبدي اعجابه ب “ثورتي” على الأشياء ويبدي اعجابه إن تجربتي في الحياة فشيخة وأكبر من سني وانه معجب جدًا بالميكس بتاع الشباب والنضج اللي انا فيه والكلام المشابه ده
ثم عرض عليا نروح بيته نستنى بنته جاية من المدرسة ونأخدها وننزل.. أنا الأول اترددت وحسيت إن لأ أنا مروحتش بيت صديق قبل كده، وأكيد ده فيه قلق. بعدين حسيت اني مكبرة الموضوع في الاخر احنا رايحين نستنى بنته وده شخص محترم تمامًا طول ما احنا قاعدين. و فرق السن بيني وبينه اكتر من ١٧ سنة.. أنا (أقل من ٢٠) سنة وهو حوالي (في نص الثلاثينات)! وصديقاته وأصدقائه اغلبهم ناس اعرف اسمائهم فيعني لو كان وسخ كنت سمعت. .كمان أنا اكس صديقه فأكيد ١٠٠٪ مافيش اي نية سيئة ومستحيل يكون بيفكر في اي حاجة فوافقت
المهم ركبنا العربية، وابتدي يكون مريب ولكن مأدركتش ده.. كان بيتعمد كل شوية يضرب كفه على ايدي وهو بيضحك وبعدين يمسك ايدي لبعض الثواني وأنا اشدها بس مش واخدة بالي ان ده في حاجة
وصلنا البيت وأنا قعدت ع طرف الكنبة زي ما أنا بجزمتي وشنطتي وكل شئ. وهو شغل فيلم وقعد بعيد.. بعد شوية طلب مني أقرب جنبه عشان الطفاية تقريبًا مش فاكرة.. وبعدين مسك ايدي بنفس الطريقة السابقة فأنا جيت أشدها ففضل ماسكها.. أنا خوفت وسكت ومعملتش حاجة ومبصتلوش.. ابتدي يقرب مني ويحضني وانا قاعدة وانا برضو وشي الناحية التانية. بعدين ابتدي يحاول يبوسني، فأنا قولتله لأ أنا مش عايزة أعمل حاجة وبعدت.. فقرب تاني وابتدي يلمس جسمي نفسه، ويبوس رقبتي وايدي ويمسك صدري ..وأنا بحاول ابعد جسمي عنه وأهم حاجة كانت بالنسبالي انه ميعرفش يبوسني أو يلمسني من تحت هدومي.. ففضلت محاولاتي اني امنع الحاجتين دول
هو فضل مكمل وبيحاول يبوسني وأنا بدأت ازوق وشه بايدي واقوله اني مش عايزة ده، وإن لو سمحت بطل. فكان بيبطل ويحضني، ويقعد يهديني ويقولي متتوتريش ومش عايزك تخافي ولا تبقي مضايقة، وكلام زي إنتي حلوة وعجباني فشخ كان شكله مرعب فشخ وصوته وبصاته مرعبين – وبعدين يرجع يعيد الأمر فأنا اقول لأ وازقه وهو يعيد الأمر. .ده حصل أكثر من مرة وأنا فيهم يا برفض وبقول لأ، وبزقه من على جسمي. بتحايل عليه يبعد عني ..لحد ما هو بالعافية “باسني” وفضلنا في اني بتحايل يبعد، وهو يحاول يهديني، ويرجع يكمل لحد ما بنته جت من المدرسة فالموضوع توقف
البنت جت وأنا كنت متجمدة فشخ ومتوترة وقاعدة ساكتة. بعدين البنت دخلت اوضتها تغير لبسها، فهو خد باله اني خايفة ومتوترة فقعد يقولي مالك؟ وأنا بقوله مافيش وبتجاهله، فحضني وقالي “عايز دماغك تفضى خالص انهاردة، ومتضايقيش من حاجة. أنا معملتش دة عشان تقعدي تتسحلي برضو”. بنته نزلت فهو بعد عني بسرعة، وكل ده وأنا مش مدركة ايه اللي حصل . وكملت اليوم معاه هو وبنته في احد المولات وأنا متجاهلاه بس بكلم بنته عادي. واحنا في المول بنته مدت شوية تعمل حاجة فمسك ايدي واحنا ماشيين، فأنا سيبت ايده وروحت ورا البنت.. كل ده وأنا مش قادرة احدد اللي حصل ده كان اعتداء؟ ولا كان بمزاجي وأنا مذنبة فيه
اليوم خلص وأنا روحت منهارة وكلمت صديق مشترك حكيتله كل شيء، وماكنتش فاهمة حاجة ولا عارفة أروح البيت
طلعت لناس اصحابي واستجمعت قوتي وهديت، وكتبلته رسالة قولتله فيها. أنه وسخ ومعتدي ومحترمش رفضي وخوفي واستغلني واستغل الفترة الصعبة اللي أنا فيها، وكمان فرق السن كمان أنه عارف اني مش الشخص اللي هيعرف يصوت ولا يفتح دماغه بحاجة
ابتدي يعتذر اعتذارات خايبة ويقول أنه في وقت سئ في حياته، وميعرفش دة حصل ازاي وانه ماكنش قصده إن ده يكون اعتداء.. وان ده كان اي حاجة الا أنه اعتداء او استغلال وانه بس “غلط في تقدير اللحظة”
بعد كدة عرفت انه الصديق المشترك كلمه عشان يقوله ان ده كان خرا وازاي عمل كده
بينما هو كان همه الاكبر ان الاكس بتاعي ميعرفش انه عمل كدة
انا اعرف بنت واحدة بس من اصحابه بشكل شخصي.. واما كلمتها بعد فترة سألتها عنه قالتلي انه متحرش وبيفرض نفسه على البنات وأنها قاطعه علاقتها بيه
من وقتها لما هي قالتلي كدة وأنا متأكدة ١٠٠٪ أنه مش زي ما كنت بحاوله، ابررله وأصدق اعتذاراه بس كون صديقة اول ما اقول اسمه تقول عليه ده. فلأ خلاص أنا واثقة ان في ضحايا اخرين ليه.. ويا ترى كام بنت تانية هو فرض نفسه عليهم؟
فكرت بعدها أخد اجراء قانوني ولكن الأول طبعًا كنت بمر بانكار للي حصل أو حجمه، وهل هو تحرش ولا اعتداء ولا زي ما هو بيقول “ده ممكن يتسمى اي شيء الا انه اعتداء او استغلال”. لحد ما كلمت محامي وقالي ان ده “هتك عرض” وعقوبته بتوصل للسجن المشدد وشوية شوية بدأت أفوق من لوم نفسي وافهم اللي حصل سيء وضخم ازاي. بعدها للأسف حسيت إني مش احسن حتة دلوقتي اني ادخل في الصراع ده. وأنا عارفة الاجراءات في مصر عاملة ازاي وكمان حسيت اني مش هقدر امشي في ده. وفي احتمال اني احطه في سجن ولو صغير ولو ده حصل بنته هتتفشخ.. فقررت اسلك دلوقتي الطريق البديل الوحيد المتاح حاليًا
مش عارفة احدد هل انا بعمل ده دلوقتي ليه، بس حاسه انه الاوبشن الوحيد اللي قدامي حاليًا وعشان أقدر احذر الاخريات اللي حواليه منه.. وعشان حسيت اني مش هقدر امشي في اجراء قانوني عشان بنته زي ما قولت
نوعًا ما كمان أكيد حاسة اني عايزه اخد حقي أو جزء منه، وإن زي ما هو فشخلي حياتي، وثقتي بالناس وبنفسي وخلاني مضطرة اتعامل مع تروما من هذا النوع فأنا كمان عايزه هو يحس بالخرا ويتفضح، والناس تعرف أنه مش الشخص اللي بيظهر كونه عليه.. أنا لحد دلوقتي بحلم بيه، ولحد دلوقتي بفتكر المشاهد دي، ولحد دلوقتي بترِب من اي لمسة عادية بسببه وبعاني من ده
ح.ح متحرش ومعتدي ومستغل. شخص مش أمان اطلاقًا انه يكون في دايرة فيها ستات
