فيما يلي نصل الشهادة السادسة التي وصلت إلينا عبر ايميل المدونة كما كتبتها صاحبتها
بعد ما قريت الشهادات اللي اتنشرت عن الصحفي الاستقصائي (ه ع) قررت ابعتلكوا شهادتي بس عايزاكوا تنشروها من غير اسمي و مش عشان خايفة منه لأنه اكيد هايعرف انا مين بمجرد ما يقرأ الشهادة لأنه اكيد عارف ضحاياه كويس و حافظهم و لكن عشان اسباب كتير تاني تخصني. ٣ اسباب هما اللي خلوني ابعت الشهادة بتاعتي و هما
١- لما شوفت الاسكرينشوتس اللي نشرتها واحدة من البنات حسيت كأني رجعت ٥ سنين تقريباً بالزمن و ده الوقت اللي عرفت فيه (ه ع) و قررت اني ابعت شهادتي اللي اكيد ولا حاجة جنب الشهادة الاولى اللي اتنشرت على المدونة . انا عرفت (ه ع) من خلال الفيسبوك و كنت منبهرة بيه و بشغله و شخصيته القوية الواثقة و من اول محادثة وهو بيتكلم ب فوقية شديدة و بعدها قالي انه اخد دبلومة في علم النفس في السويد واني واضح اني محتاجة مساعدة وانه مستعد يساعدني بس بشروط و الشروط كانت بالظبط زي الاسكرينشوتس اللي شوفتها و كأنه بينسخ الرسايل لكل ضحاياه ، وهو منظم جدا في الخطوات اللي بيعملها عشان يضمن ان الضحية ماتهربش منه ، شروطه تتلخص في الطاعة العمياء ليه و لكل اللي بيقوله واني ماليش الحق اعترض او ارفض او انسحب ،، و دي الطريقة اللي بتخليه يتحكم في ضحيته زي ما يحب و يخليها تعمل كل اللي بيطلبه بالظبط زي الكلام في الجنس او مكالمات فيديو مابيظهرش هو فيها على سكايب او سيجنال فيما بعد و ده عشان يضمن ان الضحية مش هاتمسك عليه اي محادثات او فيديوهات و يطلب فيها طلبات جنسية من الضحية و لو اعترضت يقولها ده علاج و عشان مصلحتها و انه بيساعدها عشان هي مريضة نفسياً ،، ده كله حصل معايا بس الظروف ماسمحتش اننا نتقابل ، وقتها انا ماكنتش فاهمة ان ده تحرش و ابتزاز و كنت شايفة اني شريكة فيه لأنه تم بموافقتي و عشان كدة ماكنتش باتكلم عنه ، بس بعدها فضلت فترة بتعالج نفسياً من تبعات اللي عمله في محادثاته معايا و دلوقتي انا اتخطيت اللي حصل الحمدلله الانسان ده سيكوباتي و نرجسي و سادي بشكل جنوني و كل رغباته الجنسية شاذة و سادية و مريضة و البنات اللي اتعرضوا لتحرش لفظي او جسدي او للأسف اغتصاب منه هايفهموا قصدي كويس
٢- انا باقول شهادتي عشان اقول للشاهدات السابقات اني مصدقاهم و اني فاهمة احساسهم كويس و كمان عشان اشجع كل ضحاياه انهم يقولوا شهاداتهم و مايخافوش من تهديده لأنه دلوقتي في موقف ضعف مش قوة ، و قصدي بكل ضحاياه الضحايا اللي اتأذوا نفسيا زيي قبل الضحايا اللي اتأذوا جسديا
٣- انا قررت ابعت شهادتي عشان المدافعين عنه يحاولوا يصدقوا ان اه الشخص المحترم المتربي ابن الناس اللي بيتعاملوا معاه و شايفينه اجدع و ارجل واحد في الدنيا بيعمل كدة في السر وانه قالي باللفظ انا “مابعكش” في الشغل و انه بيخاف على منظره جدا ف هاتلاقوا كل ضحايا بنات ضعيفة و مكسورة عشان يكون ضامن انهم مش هايتكلموا ، فمن فضلكوا بلاش دور الاصحاب الجدعان اللي هايوقفوا جنب صاحبهم حتى لو غلطان ، و اخيراً اللي هاتكون متأكدة انه فعلاً مدان هي مراته (اللي انا فعلا مشفقة عليها) اللي اكيد لاحظت رسايل على سيجنال او واتساب او ابلكيشنز غيرها و الشك كان “جواها طول السنين اللي فاتت ناحيته عشان مهما كان ذكي ف الحاسة السادسة للمرأة اكيد اذكى
